2020 йил 31 октябрь куни Ўзбекистон миллий университети стадионида Олимпия дастурига киритилган регби-7 бўйича эркаклар ва аёллар ўртасида Ўзбекистон чемпионатининг 1-тур баҳслари бўлиб ўтди.

Дастлаб мусобақанинг тантанали очилиш маросими ўтказилди. Унда Ўзбекистон Миллий олимпия қўмитаси президенти Р.Шоабдураҳмонов, қўмита бош котиби О.Касимов, Жисмоний тарбия ва спорт вазирининг биринчи ўринбосари Р.Ирматов, ҳамда Ўзбекистон республика товар-хом ашё биржасининг раиси З.Бадриддиновлар иштирок этиб, мусобақа қатнашчиларига омад тиладилар.

Ўзбекистон регби федерацияси ва федерациянинг бош ҳомийси –Ўзбекистон республика товар-хом ашё биржаси ходимлари регби спорт ўйини бўйича флеш-моб ўтказдилар. Мазкур тадбир Ўзбекистон Республикаси Президентининг “Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида” фармонини қабул қилиниши муносабати билан ҳамда мамлакатимизда оммавий спортни ривожлантириш ва соғлом турмуш тарзини кенг тарғиб қилиш мақсадида ўтказилди.

“Ўзбекистон республика товар-хом ашё биржаси” АЖ ходимлари мазкур спорт тадбирида томошабин сифатида иштирок этиш билан бирга тадбир давомида регби бўйича ўтказилган мастер-классларда, танаффус пайтида ҳаваскорлик ўйинларида ҳам иштирок этдилар.

Маълумот учун: Регби - жамоа бўлиб ўйналадиган спорт тури бўлиб, номи Англиянинг Регби шаҳарчаси номидан олинган. Ўзбекистонда 2001 йилда регби федерацияси дастлаб Тошкент шаҳрида очилди. Ҳозирги кунда  Ўзбекистоннинг 9 та вилоятида регби федерациялари очилиб фаолият олиб боришмоқда. Ўзбекистон регби жамоалари халқаро турнирларда муваффақичтларни қўлга киритмоқдалар. Аёллар ўртасида Ўзбекистон терма жамоаси Регби бўйича 2008 йилдаги Осиё чемпионатининг бронза медали соҳиби ҳисобланади. 2015 йили Чинайда (Ҳиндистон) ўтказилган Asian Olympic Pre-Qualifier турнири якунларига кўра регби-7 бўйича аёллар жамоси биринчи ўринни эгаллади.