2015 йилнинг 20 ноябрь куни Ўзбекистон Республикаси Миллий матбуот марказида Ўзбекистон Республикаси Молия вазирлиги Ғазначилиги томонидан ОАВ ходимлари учун “Кичик бизнес субъектларининг давлат харидлари тизимига жалб этишнинг муҳимлиги ва аҳамияти” мавзусига бағишланган матбуот анжумани ўтказилди.
Тадбирдан кўзланган асосий мақсад кичик бизнес субъектларини давлат харидлари тизимига жалб этиш соҳасида ЎзРТХБ ва Ўзбекистон Республикаси Молия вазирлиги Ғазначилиги томонидан амалга оширилаётган ишлар, тизимдаги ўзгариш , янгиликлар ҳақида ОАВ ходимларига кенг қамровли маълумотларни етказишлан иборатдир.
Матбуот анжуманида Мамлакатимиз Президенти томонидан қабул қилинган 2011 йил 7 февралдаги ПҚ-1475 сонли “ Давлат харидлари тизимини муқобиллаштириш ва уларга кичик бизнес субъектларини жалб қилишни кенгайтириш тўғрисида “ ги қарорига кўра 2011 йилнинг 1 апрелидан мазкур тизимни такомиллаштиришга қаратилган чора-тадбирларни янада мустаҳкамлаш ҳамда Давлат харидлари жараёнининг шаффофлигини таъминлаш бўйича янги тизимнинг жорий этилганлиги ва унинг самаралари ҳақида атрофлича тўхталиб ўтилди.
Янги тизим Ўзбекистон Республикаси товар хомашё биржаси томонидан электрон аукцион савдолари тартибида ташкил этилиб, Электрон савдолар Ўзбекистон Республикаси бўйлаб интернет орқали , реал вақт режимида амалга оширилади. Бу ўз навбатида бир қатор қулайликларни келтириб чиқармоқда. Аввало, электрон аукцион тизимининг аҳамиятли жиҳати бюджет ташкилотлари учун сотувчи қидиришга ҳожат йўқ. Биржа сайтига эълон беришнинг ўзи кифоя ва натижада уларга етказиб берувчилар ўз хизматларини таклиф этадилар.
Мазкур соҳада 2011-2014 йилларда амалга оширилган ишларни таҳлил этадиган бўлсак, кичик бизнес субъектларининг Давлат харидлари бўйича электрон савдолардаги иштироки 30 мингтани ташкил этганлиги ёки беш баробарга ошганлигини кўриш мумкин. Уларнинг товарлар таъминотидаги улуши 99 фоизга кўпайган. Давлат харидлари бўйича электрон савдоларда дастлабки йилларда ҳар бир талаб учун иккитадан таклиф берилган бўлса, бугунга келиб уларнинг сони олтитадан ошди.
Президент қарорини амалга ошириш мақсадида Ўзбекистон Республикаси Вазирлар Маҳкамаси ҳузурида Давлат харидлари бўйича Ҳукумат комиссияси ташкил қилинган бўлиб, унинг ишчи органи – Ўзбекистон Республикаси Молия вазирлиги Ғазначилиги тайинланди. Бу борада бир қатор ижобий ишлар амалга оширилди. Жумладан, Ўзбекистон Республикаси Вазирлар Маҳкамасининг 2015 йил 26 мартдаги 69- сонли қарори билан тасдиқланган Низом асосида “ ЎзРТХБ “АЖ да 2015 йилнинг 1 июнидан биржанинг янги электрон савдо тизими- “ Давлат харидларида электрон каталог “ ишга туширилди. Қисқа вақт ичида мазкур тизим ўзининг ижобий натижаларини кўрсатди. Жорий йилнинг июнь-октябрь ойларида электрон каталог бўйича 36,5 млрд. сўмлик битимлар имзоланиб, 9,3 млрд. сўм бюджет маблағлари иқтисод қилинди. Бу борада кичик бизнес субъектларининг улуши 100 фоизни ташкил этди.
Шунингдек, матбуот анжуманида давлат харидлари бўйича муҳим қонунчилик асослари, мазкур жараёнларда ошкораликни таъминлаш, бюджет маблағлари устидан белгиланган тартибда доимий назоратни амалга ошириш масалаларида ҳам фикр юритилди.
ЎзРТХБ, Савдо-саноат палатаси ва Молия вазирлиги ҳузуридаги Ўқув маркази билан ҳамкорликда кичик бизнес ва хусусий тадбиркорлик субъектларини малакасини ошириш бўйича ўқув курсларини мунтазам равишда ташкил этиб, уларга давлат харидларида иштирок этиш билан боғлиқ жараёнларни кенг тушунтириш бўйича ҳам таклифлар берилди.
Тадбир сўнггида журналистлар ўзларини қизиқтирган саволларга мутахасcислар томонидан жавоблар олдилар.
Курилди: 10302